ثنا میر آئی سی سی ہال آف فیم میں شامل، پاکستان کی پہلی خاتون کرکٹر

پاکستان ویمن کرکٹ ٹیم کی سابق کپتان ثنا میر کو انٹرنیشنل کرکٹ کونسل (آئی سی سی) کے ہال آف فیم میں شامل کر لیا گیا ہے، جس کے ساتھ ہی وہ یہ اعزاز حاصل کرنے والی پہلی پاکستانی خاتون کرکٹر بن گئی ہیں۔ اپنے کیریئر میں انہوں نے 121 ون ڈے اور 106 ٹی ٹوئنٹی میچز میں شرکت کی، اور بالنگ کے ساتھ ساتھ بیٹنگ میں بھی ٹیم کے لیے اہم کردار ادا کیا۔

ثنا میر پاکستان کی واحد خاتون کھلاڑی ہیں جنہوں نے ون ڈے میں 150 وکٹیں حاصل کیں، جبکہ ٹی ٹوئنٹی میں 89 وکٹوں کے ساتھ دوسری نمایاں وکٹ ٹیکر بھی رہیں۔ انہوں نے 2014 اور 2010 میں ایشین گیمز میں سونے کے تمغے جیتنے والی ٹیم کی قیادت کی، اور 2018 میں آئی سی سی ون ڈے پلیئر رینکنگ میں پہلی پوزیشن پر بھی رہیں۔

ثنا میر نے کھیل کے میدان سے باہر بھی خواتین کے حقوق، ذہنی صحت اور سماجی مسائل پر آواز اٹھائی۔ انہوں نے خواتین کرکٹ کے فروغ میں اہم کردار ادا کیا، جس کے اعتراف میں کوئٹہ کے بگٹی اسٹیڈیم میں ان کے نام سے ایک اسٹینڈ بھی منسوب کیا گیا ہے۔ ان کی خدمات کو عالمی سطح پر سراہا جا رہا ہے، اور ان کا ہال آف فیم میں شامل ہونا پاکستان ویمنز کرکٹ کے لیے ایک سنگ میل کی حیثیت رکھتا ہے۔