پاکستان اور یو اے ای میں اعلیٰ تعلیم اور افرادی قوت کی ترقی کے شعبوں میں تعاون بڑھانے پر اتفاق-
پاکستان اور متحدہ عرب امارات نے اعلیٰ تعلیم اور انسانی وسائل کی ترقی کے شعبوں میں دوطرفہ تعاون کو مزید مستحکم کرنے پر اتفاق کیا ہے۔ یہ پیش رفت ابوظہبی میں پاکستانی سفیر فیصل نیاز ترمذی اور یو اے ای کے وزیر برائے افرادی قوت و امارات کاری اور وزیر برائے اعلیٰ تعلیم ڈاکٹر عبدالرحمن بن عبدالمنان العوار کے درمیان ملاقات میں سامنے آئی۔ ملاقات میں دونوں ممالک نے تعلیم، ہنر مندی اور پیشہ ورانہ تربیت کے شعبوں میں جاری تعاون کا جائزہ لیا اور نئے مواقع تلاش کرنے پر زور دیا۔
پاکستانی سفیر نے متحدہ عرب امارات میں پاکستانی کمیونٹی کے کردار پر روشنی ڈالی اور یو اے ای حکومت کی غیر ملکیوں کے لیے دوستانہ پالیسیوں کی تعریف کی۔ انہوں نے کہا کہ پاکستان، تعلیم اور افرادی قوت کی ترقی کے شعبوں میں ادارہ جاتی تعاون کو فروغ دینے میں دلچسپی رکھتا ہے تاکہ دونوں ملکوں کو یکساں فائدہ ہو۔ ان کا کہنا تھا کہ مشترکہ اقدامات طلبا، اساتذہ، اور پیشہ ور افراد کے لیے نئے مواقع پیدا کر سکتے ہیں۔
یو اے ای کے وزیر ڈاکٹر عبدالرحمن العوار نے پاکستان کے ساتھ برادرانہ تعلقات کو سراہتے ہوئے اس بات پر زور دیا کہ دونوں ممالک کے درمیان دیرینہ روابط کو مضبوط کرنے کی ضرورت ہے۔ انہوں نے تعلیم اور انسانی وسائل کے شعبوں میں اشتراک کو باقاعدہ رابطوں کے ذریعے مزید وسعت دینے کی خواہش ظاہر کی۔ اس ملاقات کو دونوں ممالک کے درمیان اعتماد اور تعاون کے فروغ کی جانب ایک مثبت قدم قرار دیا جا رہا ہے۔
Comments
Post a Comment